টিট ফৰ টেট - ৩

মুৰ্চ্ছনা মোৰ লৰালিৰে বান্ধবী। সৰুৰে পৰা একেখন স্কুলতে পঢ়ি ডাঙৰ হৈছো। আমাৰ ওচৰৰ গাঁওখনত তাইৰ ঘৰ। কলেজৰ সাধাৰণ শিক্ষা সমাপ্ত কৰাৰ পিছত মই কামেকাজে লাগিলো। ঘৰৰ ডাঙৰ যেতিয়া দায়িত্ব অলপো আছে। মুৰ্চ্ছনাই পঢ়ি থাকিল। এম ফিল কৰি নতুনকৈ আমি পঢ়ি যোৱা কলেজখনতে সোমাইছে। অংশকালীন প্ৰবক্তা। বিয়া বাৰুৰ কথা ঘৰত চলি আছে¸ পিছে তাইহে বিচৰা নাই এতিয়াই। পি এইচ ডি কৰাৰ পিছতহে সংসাৰত সোমাবলৈ মন তাইৰ।

: পল¸ তুমি তাইক অলপ বুজোৱাচোন। ভাল সম্পৰ্ক এটা আহিছে।
- খুড়ীয়ে খাটনি ধৰে মোক। তেওলোকে ভাল জোৱাই এটা এৰি দিবলৈ ইচ্ছা নকৰে। যিহে দিনকাল¸ আজিকালি মদ-ভাং নোখোৱা চাকৰিয়াল ভাল পাত্ৰ পাবলৈয়ে টান।

: চা পল¸ মাঁহতে এনেয়ে জ্বলাই মাৰিছে¸ তই আকৌ নাকামুৰিবি দেই।
- খুড়ীহঁতৰ কথাটো কবলৈ মুখ মেলোতেই মোক ৰখাই দিয়ে তাই।

: আৰে য়াৰ¸ অলপ খুড়ীহঁতৰ কথাটোও ভাবি চাচোন। তোকতো সন্মতি দিবলৈ কোৱা নাই। লৰাজনক এবাৰ লগ কৰি চোৱাত আপত্তি কি!
- তাই মোৰ কথা পেলাব নোৱাৰিলে। ছোৱালী মানুহ¸ বয়সতো ৰৈ নাথাকে। পি এইচ দিটো বিয়াৰ পিছতো কৰিব পাৰিব।

অবশেষত সকলোৰে যুঁটীয়া প্ৰচেষ্টাত সেউ মানি তাই সন্মতি দিলেগৈ। লৰাটো ভাল। চৰকাৰী বিভাগ এটাৰ অভিযন্তা। বিয়া এইবছৰ নহয়¸ অহা বছৰলৈহে হব। এইটো সপ্তাহতে ৰিং চেৰিমনিটো কৰি থব হেনো।

যোৱা কালি তাইৰ ঘৰৰ পৰা আহিছিলো। আকৌ আজি জৰুৰী কাম এটাত মাতি পঠিয়ালে।
বৰকৈ সোধাৰ পিছতো নকলে। অফিচৰ পৰা ওলাই চিধাই তাইৰ ঘৰ পালোগৈ।
তাই বাৰাণ্ডাতে বহি আছিল।

: কি হল¸ ইমান দৌৰাদৌৰিকৈ মাতি পঠালি যে?
- বাইকখন ষ্টেণ্ড কৰি থাকিয়েই সুধিলো।
: ঐ ফেচবুকত অসভ্যালি কৰা বোৰৰ ওপৰত কিবা এক্সন লব পাৰিনে? অসভ্য এটাই জলাই মাৰিছে।
- মই বাৰাণ্ডাত উঠাৰ লগে লগে কলে তাই। নিজৰ ফোনটো মোক দেখুৱালে।

: হাই বেবী¸ ইউ আৰ চো হট। আই লাভ ইউ আই লাভ ইউ। আই মিছ ইউ…
- মেচেঞ্জাৰত লৰা এটাই মেচেজ কৰিছে। প্ৰফাইলতো চালো¸ সি তাইৰ ফ্ৰেণ্ডলিষ্টত নায়েই। এটা ফটুৱা মাৰ্কা চেঙেলীয়া লৰা। তাই এবাৰো ৰিপ্লাই কৰা নাই।

ছ’চিয়েল মিডিয়াত বহুত ফটুৱা মানুহ আছে। ধুনীয়া ছোৱালী¸ বোৱাৰী দেখিলেই ফটুৱামি আৰম্ভ কৰে।

: পল¸ কি কৰা ভাল হব? মই কাকো কোৱা নাই। মৃন্ময়কতো কবই নোৱাৰো¸ কি বা ভাবে!
- মৃন্ময় তাইৰ হব লগা স্বামী। এতিয়াও খং উঠি আছে তাইৰ।

: যধেমধে মানুহবোৰ এড কৰিবি। পালি মজাটো।
- তাইক জোকাবলৈয়ে কলো মই।

: কতনো এড কৰিলো। চিনিয়ে নাপাও। মোৰ ফ্ৰেণ্ডলিষ্টত নায়েইতো।
- অলপ খং উঠিল তাইৰ। মই ঢেকঢেকাই হাঁহি দিলো।

: চা¸ এইটো একেবাৰে সাধাৰণ কথা দেখোন। স্ক্ৰীণশ্বট এটা মাৰি দে।
- সাধাৰণভাবে কলো মই।

: তাকেইতো নোৱাৰো অ’। জানইচোন¸ মই ভাবি চিন্তিহে ষ্টেটাছবোৰ দিও। স্ক্ৰীণশ্বট মাৰি কলে সকলোৱে গম নাপাবনে! মোৰ ফ্ৰেণ্ডলিষ্টত ষ্টুডেন্ট¸ কলীগ¸ চিনিয়ৰ সকলো আছে। মে’মৰ লগত কোনোবাই মিছ বিহেভ কৰিছে বুলি জনাবলৈ ভাল নালাগিব অ’। আনহাতে আইনৰ সহায় লৈ লাগি থাকিবও নোৱাৰোচোন।
- কৈ উঠিল তাই। মই তাইৰ মুখলৈ চাই ৰলো। বুজিলো¸ তাই তাক এসেকা দিব খুজিছে। মাথো উপায়হে পোৱা নাই।

: ড’ন্ট ৱৰী¸ এনেকুৱা সকলো বেমাৰৰ মেডিচিন মোৰ ওচৰত আছে।
- হাঁহি মাৰি কৈ উঠিলো মই।

: জানোতো অঘাইটং। সেয়ে কাকো নকৈ তোক কৈছো।
- হাঁহি মাৰি লাহেকৈ মোৰ পিঠিত বাঘঢকা এটা দিলে তাই।

: চাও¸ তোৰ ফোনটো দে। এইটোক ফৰ্মুলা হাণ্ড্ৰেড বুলি কয়।
- তাইৰ ফোনটো হাতত ললো মই।

: চা মুৰ্চ্ছা¸ ই বেটাই আমাৰ লৰাবোৰৰ নাক কাটিছে। গতিকে আমাৰো অলপ দায়িত্ব আছে দেচোন।

তাইক চমুকৈ মুৰ্চ্ছা বুলি মাতো মই। আচৰিত হৈ তাই মোৰ মুখলৈ চাই থাকিল। মই কৈ থাকিলো।

: এতিয়া আমি এশজন লৰাই বেটাক সি কৰা কামৰ বাবে গালি পাৰি মেচেজ কৰিম। এজনী ছোৱালীক অশান্তি কৰিলে¸ বিপৰীতে এশজন লৰাই তাৰ অশান্তি কৰিম। কথাটো ভাবিয়েই ভাল লাগিল মোৰ। তাইৰো চকুদুটা নাচি উঠিল।

: অপ্ৰিয়¸ ঘৃণনীয় শ্ৰীমান¸
আপুনি কৰা কামটো কিমান ভাল হৈছে এবাৰ চিন্তা কৰিব। আপোনাৰ মাক¸ ভনীয়েক¸ ঘৈনীয়েক¸ জীয়েকৰ লগত এইবোৰ আনক কৰিব দিবনে??? এইকথা গম পালে চাগে হবলগা ঘৈনীয়েকে চিপ লব¸ জীয়েকে মুখত থুৱাব¸ ভনীয়েকে নৈত জাপ দিব¸ মাকে বিষ খুৱাই মাৰিব¸ বাপেকে ত্যাজ্যপুত্ৰ কৰিব!!
ভাবি আচৰিত হৈছো¸ আপোনাৰ জন্ম কিয় হৈছিল! হয়তো নিৰ্দোষী মাক-বাপেকে কুলাংগাৰ এটাক জন্মদিয়াৰ দোষতে চবৰে গালি খাইছে। ভগবানক প্ৰাৰ্থনা কৰিছো¸ সুমতি দিয়ক।
- মোৰ লিখাখিনি চাই চাই তাই হাঁহি থাকিল।

: অ’ই তোৰ শুভ হাতেৰে চেন্ট কৰ।
- তাইক মেচেজটো চেন্ট কৰিব দি অসভ্যটোক ব্লক কৰি দিলো।

: অ’ই তোৰ লিখাখিনি পঢ়ি এইটোৱে আত্মহত্যা নকৰিলেই হল আৰু।
- হাঁহি হাঁহি তাই কৈ উঠিল।
: ভালহে হব। কুলাংগাৰ এটা কমিব।
- ময়ো হাঁহি দিলো।

: ঐ পাগল¸ অচিনাকী ছোৱালীক অশান্তি কৰি কি লাভ পাবি ঐ? নষ্ট চৰিত্ৰৰ বুলি ৰাজহুৱা চাৰ্টিফিকেট এখন কিয় লব খুজিছ?
- এশজন লৰাই এনেকৈ মেচেজ কৰিলে নিশ্চয়কৈ সি ভাবিব বাধ্য হব। লাজপাই কেনেবাকৈ ভালহলেতো ভালেই!

এজনী ছোৱালীক অশান্তি কৰিলে এশজন লৰাই ৰিভেঞ্জ লব! কথাটো ভাবিয়েই ভাল লাগিছে মোৰ। ৰিভেঞ্জ…টিট ফৰ টেট।।
*******